រដ្ឋបាលខេត្តសៀមរាប សហការជាមួយស្នងការដ្ឋាននគរបាលខេត្ត បើកិច្ចប្រជុំផ្សព្វផ្សាយខ្លឹមសារ អនុក្រិត្យលេខ៤៧ អនក្រ.បក ចុះថ្ងៃទី១ មេសា ឆ្នាំ២០២៥និង ប្រកាសលេខ ៤២២១ប្រក ចុះថ្ងៃទី១១ ខែមេសា ឆ្នាំ២០២៥ របស់ក្រសួងមហាផ្ទៃ នាព្រឹកថ្ងៃទី ២៨ ខែឧសភា ឆ្នាំ២០២៥ ក្រោមអធិបតីភាពរបស់ លោក លី សាលី អភិបាលរងខេត្ត តំណាងឯកឧត្តម ប្រាក់ សោភ័ណ អភិបាលនៃគណៈអភិបាលខេត្ត ដោយមានការអញ្ជើញចូលពីលោកឧត្តមសេនីយ៍ទោ ហួត សុធី ស្នងការនគរបាលខេត្ត និងការនិមន្តចូលរួម ពីព្រះសង្ឃ អស់លោក លោកស្រីជាមន្ត្រីនគរបាលទទួលបន្ទុកអត្តសញ្ញាណប័ណ្ណ មន្ទីរ អង្គភាព ពាក់ព័ន អាជ្ញាធរក្រុង ស្រុក ឃុំ សង្កាត់ ស្មៀនឃុំ សង្កាត់ និង មន្ត្រីនគរបាលប៉ុស្តិរដ្ឋបាលឃុំ សង្កាត់ ប្រមាណជា ៤០០អង្គ/នាក់ចូលរួម ។
មានប្រសាសន៍បើកការផ្សព្វផ្សាយនោះ ក្នុងនាមឯកឧត្តម ប្រាក់ សោភ័ណ អភិបាលនៃគណៈអភិបាលខេត្ត លោក លី សារី បានធ្វើការវាយតម្លៃខ្ពស់ អំពីលទ្ធផលដែលរដ្ឋបាលក្រុង ស្រុក និង សមត្ថ កិច្ចគ្រប់ជាន់ថ្នាក់ដែលអនុវត្តបាន លើការបម្រើសេវាសាធារណៈ និង ការងារសន្តិសុខ សុវត្ថិភាពជូនប្រជា ពលរដ្ឋ ។ លោកអភិបាលរងខេត្តបានបន្តទៀតថា កិច្ចប្រជុំដ៏មានសារៈសំខាន់នេះ ជាការកែទម្រង់លើគ្រប់ វិស័យគឺក្នុងគោលដៅដើម្បីបម្រើ ឧត្តម ប្រយោជន៍ជាតិ និងឆ្លើយតបទៅនឹងសំណូមពរ និងសេចក្តីត្រូវការរបស់ប្រជាជន ដែលឆ្លើយតបទៅនឹងរបៀបវារៈគោលនយោបាយសង្គម សេដ្ឋកិច្ច សម្រាប់ ជម្រុញនៃការអនុវត្តប្រកបដោយ ប្រសិទ្ធភាពនូវ « កម្មវិធីនយោបាយ » របស់ខ្លួន និងជាមគ្គុទេសក៍ សម្រាប់តម្រង់ទិសគ្រប់តួអង្គក្នុងគោលដៅ ដើម្បីបន្តរក្សាឲ្យបានរឹងមាំនូវសុខសន្តិភាព និងពង្រឹងមូលដ្ឋានគ្រឹះសម្រាប់ចម្រុញសន្ទុះនៃការអភិវឌ្ឍប្រទេសជាតិ ក្នុងរយៈពេលវែង និងវែងទៅមុខតាមរយៈ ការកែទម្រង់មុតស្រួចលើគ្រប់វិស័យ ។ ក្នុងនោះដែរលោក លី សារី ក៏បានលើកផងដែរ អំពីភាពវិជ្ជមាន និង អវិជ្ជមាន ក្នុងការធ្វើអត្តសញ្ញាណប័ណ្ណ ជូនប្រជាពលរដ្ឋ នៅតាមមូលដ្ឋានកន្លងមក ។ ក្នុងការផ្សព្វផ្សាយពេលនេះ ពីការធ្វើអត្តសញ្ញាណប័ណ្ណសញ្ជាតិខ្មែរត្រូវ ផ្តល់ជូនប្រជាពលរដ្ឋគ្រប់រូប មានអាយុពី១៥ឆ្នាំឡើង មានសិទ្ធិក្នុងការប្រើប្រាស់អត្តសញ្ញាណប័ណ្ណសញ្ជាតិខ្មែរ មិនថាគាត់ជាជនវិកលចរិក ហើយថ្មីៗនេះក្រសួងមានចុះផ្តល់អត្តសញ្ញាណប័ណ្ណសញ្ជាតិខ្មែរដល់ព្រះសង្ឃ ចាប់ផ្តើមបើកឆាកដំបូងនៅវត្តគល់ទទឹង រាជធានីភ្នំពេញ ។ មូលហេតុដែល រាជរដ្ឋាភិបាលសម្រេចបែបនេះ ដោយសារតែប្រជាពលរដ្ឋខ្មែរទាំងអស់នៅពេលទៅទិញស៊ីមកាតក៏ពិបាក ដូចជាព្រះសង្ឃទិញស៊ីមកាតគេទាមទារអត្តសញ្ញាណប័ណ្ណសញ្ជាតិខ្មែរ ។ ជាមួយគ្នានេះ គ្រប់ទីកន្លែងលោកបិនបាតសុំឲ្យមានការដោះស្រាយ ហើយរាជរដ្ឋាភិបាលកម្ពុជាដឹកនាំដោយសម្តេចធិបតី ហ៊ុន ម៉ាណែត នាយករដ្ឋមន្ត្រី ក៏បានសម្រេចអនុញ្ញាត្តឲ្យប្រជាពលរដ្ឋខ្មែរគ្រប់រូប ដែលមានអាយុពី១៥ឆ្នាំឡើង មានអត្តសញ្ញាណប័ណ្ណសញ្ជាតិខ្មែរប្រើប្រាស់ទាំងអស់ ដែលពីមុនព្រះសង្ឃ ជនវិកលចរិក ជនជាប់ឃុំ ។ ប្រជាពលរដ្ឋដែលមានអាយុ១៥ឆ្នាំឡើងរហូតដល់ក្រោមអាយុ៦០ឆ្នាំសុពលភាព១០ឆ្នាំដដែល តែពីអាយុ៦០ឆ្នាំឡើងឲ្យសុពលភាពអចិន្ត្រៃយ៍នេះជាការសម្រេចរបស់រាជរដ្ឋាភិបាលហើយការប្រើប្រាស់អត្តសញ្ញាណប័ណ្ណសញ្ជាតិខ្មែរ គោលបំណងជារួមគឺ បញ្ញាក់អត្តសញ្ញាណ-ប័ណ្ណសញ្ជាតិខ្មែរ ដូចជាការបំពេញបែបបទចូលរៀន ការបំពេញបែបបទចូលបំរើការងារ ចុះបញ្ជីយានយន្ត ការចុះបញ្ជីអចលន:ទ្រព្យ ការបើកគណនីធនាគារ ការប្រើប្រាស់ផ្សេងៗ ។ លោកបានផ្តាំផ្ញើដល់សមាជិកកិច្ចប្រជុំផ្សព្យផ្សាយទាំងអស់ ឲ្យខិតខំត្រង់ត្រាប់ស្តាប់ និងលើកនូវចម្ងល់ សំណួរ បញ្ហាប្រឈម ដែលជួបប្រទះក្នុងពេលអនុវត្តន៍ជាក់ស្តែង ដើម្បីឲ្យមន្ត្រី ជំនាញបកស្រាយឲ្យបានច្បាស់ ក្នុងការយកទៅបំពេញការងារត្រឹមត្រូវតាមច្បាប់ និងនីតិវិធី ឲ្យបានទាន់ពេលវេលា ស្របតាមតម្រូវការរបស់ ប្រជាពលរដ្ឋក្នុងមូលដ្ឋានទទួលខុសត្រូវរបស់ខ្លួន៕​ ម៉ី សុខារិទ្ធ ភ្នាក់ងារខេត្តសៀមរាប