មណ្ឌលគិរី : ផ្អែកតាមឯកសារតឹកតាងជាច្រើនគេរកឃើញថា អ្នកផ្ដើមគំនិតដែលធ្វើឲ្យមានភាពជ្រួលច្របល់ ក្លាយជាវិបត្តិដីធ្លីគួរឲ្យភ្ញាក់ផ្អើលដល់ពលរដ្ឋជិត២រយគ្រួសាររស់នៅក្នុងភូមិអូរស្ពាន សង្កាត់ស្ពានមានជ័យ ក្រុងសែនមនោរម្យខេត្តមណ្ឌលគិរី និងធ្វើឱ្យថ្នាក់ដឹកនាំក្រសួងដែនដីនគរូបនីយកម្ម និងសំណង់ មានការភាន់ច្រឡំនោះ គឺបណ្ដាល មកពីបុគ្គលឈ្មោះ សាន សូត្រ និងប្រព័ន្ធអំពើពុករលួយថ្នាក់មូលដ្ឋាន ។

តាមសេចក្ដីរាយការណ៍ និងភស្តុតាងឯកសារជាច្រើនបានឲ្យដឹងថា ឈ្មោះ សាន សូត្រ ហៅ ប្លោក បានឃុបឃិតជាមួយអាជ្ញាធររៀបចំឆាកល្ខោនដោយយកឈ្មោះពលរដ្ឋពីខេត្តផ្សេងៗមកតាងឈ្មោះនៅលើដីស្រល់ ឬដីរបស់ក្រុមហ៊ុន Sampling ក្រុមហ៊ុន Wozhi Shan និងក្រុមហ៊ុន ហួរលីង ជាដីសម្បទានសេដ្ឋកិច្ចរបស់រដ្ឋ និងដីគម្របព្រៃឈើឆ្នាំ ២០០២ ដែលពលរដ្ឋកំពុងរស់នៅ និងអាស្រ័យផល  ហើយបានឱ្យឈ្មោះ សាក់ ហ៊ាន ជាចៅសង្កាត់ស្ពានមានជ័យប្រថាប់ត្រាទទួលស្គាល់ , ចំណែកឈ្មោះ ឈាង ប៉ាក់សួរ ចាំទទួលទិញ។

ប៉ុន្តែយ៉ាងនេះក្ដី យោងតាមកំណត់ហេតុមួយចុះថ្ងៃទី ១២ ធ្នូ ឆ្នាំ ២០១៨ លោក សុង ឃាង ប្រធានមន្ទីរកសិកម្ម បានជំទាស់ទៅនឹងនីតិវិធី នាំទៅដល់ការផ្ដល់ដីជាកម្មសិទ្ធិដោយលោកលើកឡើងថា ជាដីគម្របព្រៃឈើដែលទាមទារឲ្យសុំអនុប្រយោគជាមុន និងជាដីរបស់ក្រុមហ៊ុនដែលជាទ្រព្យសម្បត្តិរបស់រដ្ឋ។ ដូច្នេះត្រូវអនុវត្តតាមច្បាប់ជាធរមាន ។

ចំណែកលោក ម៉ៅ ចំរើន ប្រធានមន្ទីររៀបចំដែនដី នគររូបនីយកម្ម សំណង់ និងសុរិយោដី ក៏បានលើកឡើងដោយយោងទៅលើលិខិតរបស់ក្រសួងកសិកម្មលេខ ៩៥៣២សកស ចុះថ្ងៃទី២៨ ខែកញ្ញាឆ្នាំ ២០១៨ ដែលបញ្ជាក់ថា ក្បាលដីទាំងអស់នៅក្នុងភូមិអូស្ពានជាន់ជាមួយក្រុមហ៊ុនព្រៃសម្បទាន Sampling ក្រុមហ៊ុនដីសម្បទានសេដ្ឋកិច្ច Wozhishan ក្រុមហ៊ុនហួរលីង និងគម្របព្រៃឈើឆ្នាំ ២០០២ ។

ថែមលើនេះខាងទីស្ដីការគណៈរដ្ឋមន្ត្រីក៏បាន ចេញលិខិតលេខ ៣៨ សជណ.កធ ចុះថ្ងៃទី ២១ មករា ឆ្នាំ ២០២១ ដោយរាករណ៍ចោលទាំងអស់រាល់លិខិតស្នាមផ្សេងៗដែលចេញដោយអាជ្ញាធរ ហើយថែមទាំងបានជំរុញឲ្យមានចំណាត់ការផ្លូវច្បាប់ ទៅលើការចេញវិញ្ញាបនបត្រ សម្គាល់ម្ចាស់អចលនវត្ថុមិនប្រក្រតី ការបំប្លែងដីរដ្ឋ នៅលើកដីស្ថិតក្នុងដែនសមត្ថកិច្ចក្រសួងកសិកម្ម និងនេសាទ នេះទៀតផង ។

ជាមួយគ្នា លោក ឈាង ប៉ាក់សួរ នៅតែមិនបោះបង់ កាលពីថ្ងៃទី ២៦ សីហាឆ្នាំ ២០២៤ បានដាក់លិខិតទៅកាន់ខុទ្ទកាល័យសម្ដេចបវរអធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជាឲ្យជួយអន្តរាគមន៍កាត់ឆ្វៀលដីទំហំ ២៨៣ហិកតា ពីគម្របព្រៃឈើឆ្នាំ ២០០២ ឬពីក្រុមហ៊ុនដីសម្បទានសេដ្ឋកិច្ចខាងលើផងដែរ ដែលរហូតមកដល់ពេលនេះពុំទាន់មានចម្លើយតបពីក្រសួងកសិកម្មនៅឡើយទេ ។ បើដូច្នេះចុះក្រសួងរៀបចំដែនដី នគរូបនីយកម្ម និងសំណង់ ចេញលិខិតយល់ព្រមឲ្យមន្ទីររៀបចំដែនដី នគរូបនីកម្ម និងសុរិយោដី ចេញវិញ្ញាបនបត្រសម្គាល់ម្ចាស់អចលនវត្ថុទៅឲ្យឈ្មោះ ឈាង ប៉ាក់សួរ ដែលគេមិនដែលឃើញមុខនៅលើទីតាំងដីដែលអះអាងថា ជារបស់ខ្លួននោះ សំអាងទៅលើអ្វី ?

ប៉ុន្តែយ៉ាងណាក៏ដោយ នៅក្នុងការតវ៉ារបស់ប្រជាពលរដ្ឋកាលពីចុងខែមីនាកន្លងទៅ ពួកគាត់គ្រាន់តែចង់ឲ្យស្ថាប័នជំនាញដីធ្លីមេត្តាផ្ទៀងផ្ទាត់ឯកសារគតិយុត្តិ ដែលក្រុមលោក ឈាង ប៉ាក់សួរ រៀបចំផ្ញើទៅដើម្បីរំលោភយកដីពួកគាត់ដែលកំពុងរស់នៅអាស្រ័យផល និងចុះមកពិនិត្យស្ថានភាពជាក់ស្ដែងតែប៉ុណ្ណោះ ៕

57 Responses

Leave a Reply to Ada716 Cancel reply

Your email address will not be published. Required fields are marked *

0
    0
    Your Cart
    Your cart is emptyReturn to Donation